આ સમયગાળા પછીથી કાસમ અલી બાપુ બહેરૂનીએ બેક વર્ષ માટે નગર પંચાયતનું સુકાન સંભાળેલું. જેઓના કાર્યકાલ દરમિયાન નગર પાલિકાના કર્મચારીઓના કેટલાક પ્રશ્રનો સંતોષજનક ઉકેલ કરી નગર વિકાસ કાર્યને આગળ ધપાવેલ.

       ૧૯૯૦-૯ર દરમિયાન પુન: નગર પંચાયતનો દોર શ્રી અમુભાઈ જાનીની રાહબરી નીચે આવ્યો. એકવીસમી સદીની આલબેલ સંભળાતી હતી અને વીસમી સદી વિદાય લઈ રહી હતી.

        કોડીનાર નગરનો વિકાસ ચારેગમ ખૂબ ઝડપથી થઈ રહ્યો હતો. ઘણી બધી સોસાયટીઓ અને આવાસો બની રહ્યાં હતાં. આથી સૌને નગર વિકાસ અનુસાર સેવાઓ અને સુવિધાઓ મળે તેવી આકાંક્ષાઓ નગર જનોમાં વધી રહી હતી. ૧૯૯૩ના અરસામાં નગર પાલિકાના લાંબા સમય માટે રહેલા સુકાની એવા શ્રી અમુભાઈ જાની નિવૃતિ તરફ જઈ રહ્યાં હતાં. નગર વિકાસની અપાર સેવા પછી શ્રી અમુભાઈની વિદાય પછી સ્વલ્પ સમય માટે શ્રી ભીખુભાઈ કાદરી નગર સુકાની તરીકે આવ્યાં.

        એકવીસમી સદીનું આગમન કોડીનાર નગરના વિકાસની સર્વાંગ સીમાઓને પાર કરીને એક અનોખા નવસર્જનની ઝંખના કરી રહ્યું હતું. એક નવી દષ્‍િટની ખોજ કરી રહ્યું હતું. તેવા સમયે કોડીનાર નગરને નવસર્જનના સ્વપ્નાઓને પારપાડવાની ઉત્કંઠ ઝંખના ધરાવતો યુવાન નગર પ્રમુખ તરીકે ઉપલબ્ધ થયો, કોડીનાર નગરનું સુકાન એક યુવાને દઢતા પૂર્વક સંભાળ્યું અને નગર રૂપી અશ્વની લગામ તેમના હાથમાં આવતાં જ નગર અશ્વએ વિકાસની હરણ ફાળભરી અને નગરનું સમૂળગુ રૂપ બદલાઈ ગયું. આ યુવાન પ્રમુખ એટલે શ્રી દિનુભાઈ સોલંકી.

      ૧૯૯૪માં શ્રી દિનુભાઈ સોલંકી નગર પંચાયતના પ્રમુખ તરીકે ચુંટાઈ આવ્યા. જાહેર જીવનમાં પગ મુકનાર આ યુવાને ઘણા બધા અનુભવોનો અભ્યાસ પોતાના મનોમન કરી લીધેલો અને ઘણાં મહાનુભાવો તથા અધિકારીઓ, પદાધિકારીઓ સાથે રહી ઘણું ઘડતર મેળવી લીધું હતું. આ બધા અનુભવોનીરૂએ તેઓ દ્વારા ઘણાં બધાં કાર્યો ખૂબ જ સફળતાભેર પાર પડયાં. એક રીતે જોઈએ તો તેમના પ્રત્યેક કાર્યમાં જોમ, વિશ્વાસ, કાર્યદક્ષાતા અને એક આગવી દષ્‍િટ જોડાયેલી હતી. સાથો સાથ નગરના યુવાન વર્ગોના તમામે તમામ જાતિ-જ્ઞાતિ તરફથી તેમને સાથ મળ્યો પરિણામરૂપ આ તરવરિયા યુવાનના હાથમાં સત્તા-નગરપંચાયતનો દોર આવતાં તેમણે કોડીનારની સમગ્ર સિકલ બદલાવી નાખી અને નગર વિકાસની યાત્રા પૂર ઝડપે આગળ વધી તેમના કાર્યકાલ દરમિયાન ઘણાં ઐતિહાસીક કાર્યો સફળ રીતે પાર પડયા.